Jan 262012
天婦羅一向都係自己最鍾情嘅日本料理。不過好少食。平時食任何嘢都無講究。同一樣嘅嘢，例如壽司，最平嘅回轉壽司到高級壽司料理店，我基本上都無所謂。早幾年不時幫襯銅鑼灣sushi hiro。但係後來發覺越食越貴。唔捨得，因為我真係唔覺得佢同平一截嘅有咁大分別。相反，係東京食過幾次嘅銀座久兵衛，價錢差不多（按：係十進制之後，即係之前仲要平過香港），我就覺得物超所值。首先，壽司師傅同客人之間係唔會有任何嘢（例如雪櫃）阻住師傅表現。師傅每一握，每一刀都乾淨利落，唔會有多餘嘅動作。真係好似睇表現咁。而因為差不多每完成一個動作，師傅都會洗一次手，所以我每次都會覺得難為咗佢。佢地真係為每一件壽司付出過。不過，原來唔係每一間久兵衞都一樣。試過有一次，貪方便，幫襯住緊嘅酒店分店。同一般日本百貨公司樓上嘅壽司店無分別。
講番吉川，係麻生圭子兩本書都有介紹過。知道係老鋪同得十個坐位。一定唔會差得去邊。最緊要，最貴個lunch set都係4000円。係香港，四季嘅inagiku夜晚set連加一，一千有找。今日下晝就試咗個貴set。種類同件數都比inagiku少係真嘅。但係已咁嘅價錢就可以係間百年老鋪食一餐都算豐富嘅，都算物有所值。由於無訂位，所以去到被安排係隔離嘅等位室等候。大概等咗廿分鐘。等嘅時候，除咗有熱茶供應，仲可以欣賞非常優雅嘅庭園。不失為一個消磨時間嘅好方法。
