今日中午收到風話香港仔山窿謝記魚蛋做到三月底關門。即時嘅反應係，原來個鋪唔係佢地嘅，又一個無良業主瘋狂加租迫走租客。心諗謝記咁好生意都租唔起，一定係以倍加。謝記平時晏晝一定滿座，今日梗加唔使諗唔使排隊。於是3點後施施然揸車泊咗係謝記後面嘅漁暉道。行到入香港仔舊大街，離遠見到謝記大鋪嗰邊依舊如常午巿後落咗閘，門外亦無人龍。暗讚自己3點半先食晏嘅英明決定。由細鋪門口入店後即刻發覺唔對路。坐位坐滿八八、九九不特止，客人完全唔似閒日嘅街坊。見原來大鋪有開，於是行過去大鋪搵位坐。
大鋪比起星期六、日要少人，但係總覺得氣氛同平日唔同。非常肚餓，於是諗先叫碗什會鍋，然後再外買一斤炸魚片返屋企繼續食。落單時終於知道店內充斥住嘅係乜嘢氣氛-係打完仗嘅氣氛。落單阿姐話差唔多所有嘢都賣晒！只係剩番魚蛋、魚片、牛丸同墨魚丸。另外，斷斤計嘅外賣亦都賣晒。問我仲係咪要什會鍋。我話無問題。落完單無耐，聽到牛丸同麵都賣晒。我真係唔敢想像今日由開門到午巿嘅「戰況」係有幾咁激烈。要知道，謝記係日日都好好生意。星期六、日要排隊堂食不在話下，平日亦不時見小人龍外買。名副其實係見慣大場面。半日俾人清晒倉，我相信係第一次。行去大鋪櫃面埋單時，見阿姐（平時埋單都會同佢答一兩句咀，相信佢應該都係謝家嘅人）同近櫃面枱一個客傾緊偈，諗住放低銀兩走人。心諗一切盡在不言中。點知佢指住我同個客講話我都係自己友，成日嚟架。其實有啲唔好意思，因為2012真係少咗幫儭。忍唔住問阿姐會唔會再開，佢好肯定話唔會。於是我話我會係餘下日子多啲嚟。佢好開心笑住話唔使，唔使。因為謝記比較偏，所以我每次都係揸車去。而十次有八次都係泊係漁暉街。另兩次會泊係香港仔舊大街。應該係2008或2009開始嚟謝記。今日第一次食「牛肉乾」。睇嚟，由現在到三月尾我要改搭其他交通工具去謝記為佢打氣。
無得外賣又仍然肚餓，於是諗起同樣係舊店嘅枝記。好彩佢門口嘅咪錶有位。唔使驚食多張「牛肉乾」。叫咗碗筋腩撈後，即google有關謝記嘅新聞。原來謝記唔係俾人迫走，個鋪亦都其實係佢地嘅自置物業。「光榮結業」嘅原因係因為食材短缺，無人接班同請人困難。無論乜嘢原因都好，有特色同老子號嘅香港食店，四月又少一間。
平日嘅什會鍋
大戰後嘅什會鍋
香港政府請食嘅牛肉乾
枝記嘅筋腩撈
