大感冒差不多痊癒，外出時已不再需要帶口罩。查閱這星期withings記錄得的數據，發現有「驚喜」- 就是體重下降了。雖然經常跑步的日子已經過了三個多月，但體重一直沒有顯著的下降。間中有一、兩次還錄得上升。可能人到中年，新陳代謝真的比以往慢了。不過在飲食習慣沒有改變下，大幅度增加了的運動量竟然未能帶來減「磅」，確實是對自己的一個小打擊。還記得早大概十年前，第一次嘗試每星期跑幾次步，體重在兩、三個月內便減了好幾磅。不過，當年的基數不同。想當年，自己是體重超過二百磅的標準「肥仔」。當年亦沒有恆心持續跑步。只跑了兩、三個月，見有小小成績便放棄了。體重亦都很快還原。之後一等便要等到2008年的夏天，自己才下定決心以非常減肥法，在兩星期內減了十磅。接著幾年靠比以往較健康的飲食習慣及一星期多次的瑜伽練習，才可以維持體重不多於85公斤。其實大部分時間體重都能控制在80公斤內。今次病了幾天，體重在一星期內便由83公斤降到78公斤，好像是給自己一個機會在未來幾天重新跑步時有一個更輕的身軀去練習。
休息了兩天沒有跑步後，踏入了2012年三月的第一日。回顧二月份，總共跑了66.3公哩。比一月份的41.69公哩有進步。二十九天裏跑了十五次，總算做到自己為二月份訂下平均隔天跑步的目標。
2012年1月紀錄
2012年2月紀錄
今晨踏進跑馬地遊樂場後，感覺良好。天氣亦明顯較前兩天和䁔，於是決定挑戰十公哩。在跑步徑上跑步當然要比渣打十公哩的賽道要容易得多。不過，畢竟自己從未試過在渣打十公哩外跑超過六公哩，所以順利完成後，不禁有一點興奮。亦都要再一次多謝vibram。很難想象自己一年前才因腳患被迫停止跑步以免情況惡化，一年後的今天竟然能夠輕鬆地跑畢十公哩。
今天完成的十公哩加上早年完成的三次渣打十公哩剛好等於一個馬拉松的路程。這樣的比較當然阿Q，不過亦不失為給自己的一個鼓勵。今日為三月份訂立的目標是要跑多一次十公哩。
今日姑媽請飲茶。本來諗住飲完茶後返屋企再去跑步。但喺驚飲完茶後飯氣攻心，又或者同baby m玩到唔捨得走，結果跑唔成。因為近月尾，我擔心可能完成唔到月頭訂下平均隔日跑步嘅目標，所以決定跑完步先飲茶。係渣甸山飲茶，由跑馬地馬場揸車上去應該唔使十分鐘。所以決定去幾年無去過嘅跑馬地遊樂場跑。
2005至2007期間，經常到跑馬地遊樂場跑步（因為當時住係附近）。一個月最少幾次，準備跑第一次渣打10k時更加頻密，一星期幾次。不過，雖然2007順利完成第一次渣打10k，但喺從未試過係渣打前跑過接近10k。係渣打前，係街上跑最遠只喺試過係渣打一星期前係跑馬地跑5.77k。
仲記得跑得好辛苦。有想過一半多啲嘅路程都要咁辛苦先完成，不如唔好去跑渣打啦。最後當然都有去到。講返今日，最近三個月嘅跑步果然有效。因為趕住飲茶，所以訂下目標最多跑半個鐘。結果好輕鬆用咗33分鐘跑完5.19k。平均速度仲要俾2007快。果然係日子有功。
可能因為無食早餐嘅關係，所以今朝開始跑步嘅時候覺得無乜力。平時可以幾輕鬆用35分鐘跑完4.6k（我知好慢，已經比上個月快咗3分鐘），今日跑咗10分鐘就知一定要好辛苦先可以跑完全程。既然定咗目標係平均隔日跑步，於是同自己講，唔好辛苦自己喇，聽日或者後日再跑全程啦。於是一路緩步跑，一路望住隻錶。見跑咗15分鐘就掉頭跑番去起點。結果跑咗2.97k。
番到屋企sync埋隻錶，見到平均心跳係123。計埋今朝，二月跑咗8次步，總共用咗4小時44分4秒跑完35.19k，平均心跳係139。
即係話，今朝嘅心跳要比平時慢好多，亦即係話個心比平時無「操」得咁「勁」。於是擔心會唔會對血壓無乜幫助。如果無，好似唗咗跑步嘅時間。於是即刻度。結果對自己算一個新發現。原來，輕鬆跑對血壓唔單止一樣有幫助，而且好似比落力跑更見效。
緩步跑前血壓
緩步跑後血壓
[flickr-gallery mode="photoset" photoset="72157629216290763"]
withings係自己個iphone app同網上經常介紹佢地另外一隻健康產品，WiFi Scale。用過withings嘅血壓計一個星期後，覺得功能同品質都唔錯。於是入埋個磅。其實withings個app除咗血壓外，亦都可以記錄埋體重。未買個wifi磅之前，只係試過人手輸入幾次。有咗個wifi磅之後，每朝同每晩都會企上個磅到磅。磅完之後，重量同bmi就會經wifi傳送到withings嘅雲端伺服器，然後自動更新個iphone app。
科技實在係太方便。
講開跑步，我最近証實咗原來跑步同心臟健康真係有莫大嘅關係。我指嘅當然係適量嘅跑步。幾年前係日本買過一個omron嘅坐枱式血壓計（後來香港有行貨賣）。買坐枱式因為諗越大應該越準。另外，亦貪佢有內置記憶功能，可以分別記錄兩個人嘅血壓。仲買多咗一個送俾同樣有高血壓嘅家人。不過最終都係擺多過用。因為要用機上個一、兩寸屏幕翻查記錄真係唔容易。久而久之，就索性連量度都慳番。
上年12月係網上見到withings有個可以將iphone變成血壓計嘅裝置。用app嚟記錄血壓，可以話係理所當然，合情合理。另外見個裝置成個真嘅血壓計一樣，應該都唔會唔準得去邊。其實準唔準係其次，最緊要係唔準得嚟次次都係咁唔準。因為血壓最重要係睇「走勢」。係香港見過好幾間鋪頭都有withings賣，不過唔夠amazon平，加上我要買多兩個當聖誕禮物，所以三個都係amazon買。
[flickr-gallery mode="photoset" photoset="72157629200299211"]
由收到血壓計到今日差不多兩個月，我每日都有度，連去日本都帶埋佢去。因為佢非常易用，所以無藉口唔用。最近，我仲係跑完步之後都度埋。結果俾我發現，原來係跑完步15分鐘（我最快可以返到屋企度血壓嘅時間）至1個鐘，血壓都要比平時要低（為咗減少差誤，我每次都係連續度3次）！而且唔係低少少，係低好多。
2012年2月5日血壓（跑步前／後）
[flickr-gallery mode="photoset" photoset="72157629201500281"]
試諗o下，正常情況下，一個人一日嘅血壓應該比正常嘅時候只會有升無低。由於用咗嗰血壓計，令我知道自己嘅血壓可以係一日之內因跑步而降低一個鐘，已經成為咗我跑步嘅最大原動力。
我嘅跑步五寶
光陰似箭，眨下眼，2012已經過咗12份1。係時候回顧過去一個月有無實踐啲新年願望。每日最少50字嘅中文tweet可以叫做到亦都可以話做唔到。每日係有寫最少50個中文字，但係好多時都多過一條tweet嘅文字上限。所以唯有改用blog post出。總算過到骨。至於努力誡除依賴藥物控制血壓呢方面，就好似唔多成功。不過，身體嘅嘢應該唔急得。越急可能啲血壓仲越高。只可以肯定，除咗去咗日本嗰一星期同前一個星期（有好多嘢要係飛之前做哂），自己做到隔日跑步。有nikeplus做証。每一次跑嘅路程仲越嚟越遠。依家每次跑4.5km。二月嘅目標係平均每隔日跑一次同埋係同一路徑跑快10%！
泡綠茶嘅習慣其實停咗一排，因為較早前搬屋時唔小心打爛咗個茶壺蓋。
飲過一輪茶包後，2011年尾再次買茶葉。但係因為無咗嗰茶壺蓋（玉露要用好細嘅茶壼泡），所以買咗比較無咁麻煩泡嘅八十八夜茶葉。寫到e度，因為無咗個包裝同埋唯一本茶書入咗倉，所以要google確認係八十八定係八十八夜。八十八夜應該係啱嘅。不過，有個blog話八十八夜其實係玉露古時嘅名。究竟八十八夜同玉露係咪一樣，有待確認。我只係可以肯定，係同一間鋪頭，八十八夜平一百蚊一包。同埋，八十八夜包裝嘅指示係張茶葉放入普通茶壺後，加入放咗係茶杯內兩分鐘嘅滾水，再等兩分鐘就完成。「制作」比玉露簡單快捷。可能因為有過之前嘅食葉經驗，所以無第一時間再次食葉。每次泡完茶之後，都係掉咗o的茶葉。 2012元旦日中午，飮過綠茶後，望住雪櫃入面包北海道3.6奶，忽然頭頂盞燈膽著咗。奶+茶葉=green tea latte。於是即刻將300ml嘅奶加熱，然後同埋o的泡完嘅茶葉一齊放入部vita-mix。唔使兩分鐘就完成咗我第一杯用真正茶葉做嘅green tea latte。
[flickr-gallery mode="photoset" photoset="72157628846548145"]
顔色無starbucks嘅咁綠，亦都無咁甜。除咗比chai tea latte貴幾蚊之外，比較少飲green tea latte嘅原因係太過甜。加熱後嘅奶啱啱好將茶葉raw嘅腥味中和，剩番淡淡清新嘅獨特味道。DIY green tea latte絶對係我杯茶！
其他未食過嘅茶葉，我唔評論。我食過嘅日本靜岡玉露茶葉就幾難食。因為無味不在話下（可能因為已經泡過），仲有o的腥。其實差唔多所有用綠茶做嘅食物都有o的腥味。可能因為經過加功同混雜咗其他味道，所以，雖然腥嘅程度唔同，但係可以接受。我自己就一直非常鍾意綠茶食品。但係，茶葉嘅腥唔同，係非常raw嘅腥。同埋因為浸過水，茶葉嘅體積亦比泡之前大。總言之就唔能夠一啖呑咗佢落肚啦！要「趙」一輪先呑得。每次食都有一種扮牛食草嘅感覺。諗起都打個「冷陣」。唔好意思，時間關係，又要待續…
一向都有飲開日本綠茶嘅習慣。唔係沖粉或茶包，係用茶葉泡嗰種。之前比較講究o的，飲玉露。其實完全唔叫得有硏究，只係早幾年買過一本有關日本綠茶嘅台版日本書。本書非常入門，只係介紹唔同嘅種類同點樣飲法。同旅遊書一樣，係香港唔容易搵到較深入o的嘅綠茶書。上網可能仲搵到多o的。跟住本書係prince’s building入面有間專賣綠茶嘅鋪頭買咗泡玉露嘅器具。茶葉就係citysuper買。泡玉露每次其實飲得好少。嗰杯只係大過功夫茶杯小小。每次用6g茶葉泡得好少茶。總覺徙咗o的茶葉。後來同賣茶葉嘅阿姐傾開，佢建議我食咗o的茶葉。仲話咁就最能夠吸收茶葉嘅益處。向來最怕浪費食物嘅我，覺得依個提議都幾啱聽。不妨一試。結果，我真係試過好多次。待續 …