京都國際漫畫博物館

京都國際漫畫博物館內

本來今次嘅行程未有將惠文社納於必去景點。但係因為自己最終將行程延長咗兩日，所以可以係臨走前一晚有機會去拜訪惠文社。惠文社夜晚十點先關門，所以食完飯去都得。由京都車站坐公車去大概半個鐘，唔算長，不過要轉兩種唔同嘅交通公具。不過好容易，唔會去錯車站。而最後一種交通工具叡山電車亦都非常有特色。唔係常見嘅京都地下鐡。京都同香港一樣，電車係舊時都係主要交通工具。所以去惠文社可以係一個好嘅藉口去感受一下京都嘅電車。

京都車站至惠文社

雖然唔係好知啲書講乜（因為大部份係日文書），不過睇住惠文社悉心罷設嘅書本舖排，確實係賞心樂事。

2005年較早前本來安排好去名古屋愛知縣參觀世博。機票、酒店、入場卷、各樣一早安排好。臨出門前，一直受頑病折磨嘅老友，病情惡化。於是放棄名古屋之旅。眼紅。最終，係9月18日陪老友走過佢短暫人生嘅最後一程。可能因為以上種種，所以為自己安排咗去關西散心。諗返轉頭，當決定名古屋之旅嘅時候，曾經多次係探病嘅時候，興奮地同老友分享計劃嘅進展。我諗老友可能有覺得唔好意思累我去唔成世博。其實，幾十年都無去過，又點會因為錯過一次而覺得遺憾。就算早兩年第一次去名古屋，我都無去世博展場參觀。所以，亦有可能係潛意識驅使我安排另一次日本個人遊，等老友在天上見到我終於成行。

其實，當年好興奮咁計劃嘅主要原因係第一次自己遊日本。非常慚愧，活到35歳，世界名地好多地方都去過，日本更加去過不下十次。但每次都有人安排（讀書同出差唔計）。京都同前妻係拍拖嘅時候就去過幾次。每次前妻都係我嘅導遊同盲公竹。所以，雖然去過幾次，如果突然放我係京都，我不單止會lost in translation仲會lost in kyoto。之前嘅名古屋資料用唔著，需要為京都之行重新搜集資料。偶然下，我認識到銅鑼灣嘅樂文書店。係樂文買咗幾本京阪神嘅旅遊書作參考。其中對我影響最深嘅就係日本關西世界遺產。往後幾年我都係跟住佢遊世遺。

2005京都之旅除咗係自己第一次「自己遊」之外，亦見證咗自己一生一件重要事件。前妻係無乜跡可尋下，選擇咗我唔係香港嗰5日搬走咗。由2002至2005，母親，好朋友同太太相繼離我而去。真正歷盡生離死別。自己覺得死別雖然較難一下子接受，但哀傷及哀悼真係可以隨時間減少。只要接受到永遠不能夠再見面嘅事實就得。生離就完全唔同。總覺得自己最初自2005年開始對京都嘅執着同前妻嘅離開或多或少有啲關係。

2005年時代祭

講番吉川，係麻生圭子兩本書都有介紹過。知道係老鋪同得十個坐位。一定唔會差得去邊。最緊要，最貴個lunch set都係4000円。係香港，四季嘅inagiku夜晚set連加一，一千有找。今日下晝就試咗個貴set。種類同件數都比inagiku少係真嘅。但係已咁嘅價錢就可以係間百年老鋪食一餐都算豐富嘅，都算物有所值。由於無訂位，所以去到被安排係隔離嘅等位室等候。大概等咗廿分鐘。等嘅時候，除咗有熱茶供應，仲可以欣賞非常優雅嘅庭園。不失為一個消磨時間嘅好方法。

見天色唔錯，於是建議到南禅寺參觀。南禅寺非常易去。由京都車站坐地下鐵，係烏丸御池站轉車到蹴上站落車，再行5分鐘就到。全程唔使半個鐘。

南禅寺三門嘅規格比知恩院低一級。自己就比較欣賞南禅寺嘅三門。知恩院嘅三門要經過數十級濶大嘅樓梯先達到。加上三門嘅宏偉建築，散發一種懾人嘅氣勢。自己鍾意南禅寺三門較為平易近人嘅設計。而且，南禅寺三門嘅頂係可以俾遊客行上去。當然要俾錢。如果好天一定要上去，因為風景非常靚。睇下我啲相就知。

行完南禅寺已經14：30，於是係永観堂門口前一間小店食晏。2010我自己一個人又係過晒食晏時間由南禅寺行到永観堂，見到依間小店仲開，於是即刻入咗去。今次同上次一樣都係食蛋包飯。同樣非常好食。食食下飯，突然見到窗外有雪花。之前只見過積雪，從未見過京都落雪。另一個第一次。好彩我即刻走出去感受一下。因為只係落咗幾分鐘。

食完晏，再度做訪永観堂。上次去，紅葉季節差唔多完，所以仲見到小小。今次，無咁好彩，綠色嘅葉都唔多見到。可以話係另一種風味。眼瞓，今日係咁先。聽日要送機。

係我去過嘅日本starbucks，通常都只係tall size先會有瓦杯供應。依樣嘢香港就比較進步。莫講話grande，應該係大概兩年前開始，個別嘅starbucks已經開始提供venti嘅瓦杯。日本俾我係環保嘅印象係好似全部人將嗰責任交晒俾政府處理咁。無錯佢地垃圾分類同回收係做得好好。不過，我唔覺個人嘅環保意識好強。週圍買嘢，好少見本地人自備袋。筷子梗加唔使多講。早幾年係香港慣咗自備筷子，所以好自然帶埋嚟日本。但近一年，我已經唔需要係香港自備筷子。所以今次都忘記咗帶嚟。其實，過量嘅包裝同筷子，如果唔係顧客有需求，生產商（apple就係好例子）同商鋪一定樂意減少。

食完早餐，11：30去酒店附近嘅toyota rent a car攞車，然後去宇治。

因為要泊車，所以第一次去平等院嘅南門入囗。未入平等院之前，先去中村藤吉本店醫肚。今日上下晝都係食同綠茶有關嘅食物。

中村藤吉本店

平等院嘅南門入囗

平等院

睇完平等院已經兩點半。因為揸車，所以碰一碰運氣，試下可唔可以係4點前趕到龍安寺。好彩15：45去到。搭公車一定趕唔到。

五點幾已經入黑，於是揸車去近兩年我差唔多必去嘅山元麵藏食天婦羅雞烏冬。

食完嘢，諗唔到有乜地方想揸車去，於是提早還車。

一邊臨急抱佛腳睇有關高山寺嘅資料，一邊用google maps搜尋搭公車去嘅方法。點知google maps話搵唔到公車去。

於是走去酒店concierge查詢。原來最快嘅方法就係坐京都車站前嘅jr bus。路程50分鐘。500円一程。坐到最後一個站就係高山寺嘅後門。高山寺嘅範圍其實好細。如果行，應該20分鐘內行晒。不過唔知點解，我12：30到，15：00先走得。我估係石水院我坐咗一個鐘。唔知點解，一去到啲禪院之類就好自然被佢地嘅環境同建築吸引住。寺院週圍嘅花花草草我都影咗差唔多一個鐘相。如果唔係無咗太陽同有啲雨，我可能會等遲一班車先走。所以我比較鍾意自己遊京都。尤其係去新地方。要人等又唔好意思。唔係人人咁得閑同我發癲。要我急急睇，我又唔開心。

其實高山寺無乜等別嘢睇。就算係石水院入面嘅國寶「鳥獸人物戲畫」繪卷都只係仿製品。所以完全無保安可言。高山寺係宇治茶嘅發原地，所以寺裏有一幅茶園。不過小得可憐。應該係用嚟做紀念，無實際生產。除咗石水院要收600円入場費外，其他係高山寺入面嘅地方都唔使錢。唔去慣無咁多遊客嘅寺院，可能唔會鍾意高山寺。咁橋，今晚食飯嘅地方用嘅碗有高山寺個名同寺嘅代表繪畫。

同高山寺都算有緣。

高山寺週圍

石水院

茶園

金堂

金堂道