rod kar 賈思信

日本漫畫係出咗嚟社會做事後第二年舊公司嘅同事介紹我開始睇。之前，同所有係香港大嘅70後一樣，當然接觸過好多日本電視動畫，例如高達，千年女皇、忍者小靈精、叮噹、足球小將等等。多數都係科幻或者動作居多。當時唔知道原來每一個電視動畫背後嘅創作經過都係由漫畫於週刊連載開始。當然只有受歡迎嘅漫畫先有機會被動畫化啦。仲記得係90年代每個星期二都會到公司附近嘅報攤買當日出嘅EX-am漫畫週刊。追過好多係EX-am連載嘅漫畫，比較有深刻印象嘅有浪客劍心同足球小將。係京都嘅京都國際漫畫博物館曾經嘗試參觀過兩次，但係因為種種原因，不能成事。終於要等到上星期先能夠完成。不過由於係博物館臨關門前唔夠一個鐘到達（6點關門），所以只能走馬看花胡亂看一次。有機會一定要再去過。日本漫畫有好多種類，不過唔係每種都啱小朋友睇。遲啲有機會介紹幾本自己鐘意嘅。

京都國際漫畫博物館

京都國際漫畫博物館內

2005年10月21日第一次獨自去日本關西。日子記得十分清楚，因為旅程嘅目的係睇每年10月22日係京都舉行嘅大型巡遊-時代祭。安排早一日到達大阪入住酒店，第二日一早搭車到京都。

2005年較早前本來安排好去名古屋愛知縣參觀世博。機票、酒店、入場卷、各樣一早安排好。臨出門前，一直受頑病折磨嘅老友，病情惡化。於是放棄名古屋之旅。眼紅。最終，係9月18日陪老友走過佢短暫人生嘅最後一程。可能因為以上種種，所以為自己安排咗去關西散心。諗返轉頭，當決定名古屋之旅嘅時候，曾經多次係探病嘅時候，興奮地同老友分享計劃嘅進展。我諗老友可能有覺得唔好意思累我去唔成世博。其實，幾十年都無去過，又點會因為錯過一次而覺得遺憾。就算早兩年第一次去名古屋，我都無去世博展場參觀。所以，亦有可能係潛意識驅使我安排另一次日本個人遊，等老友在天上見到我終於成行。

其實，當年好興奮咁計劃嘅主要原因係第一次自己遊日本。非常慚愧，活到35歳，世界名地好多地方都去過，日本更加去過不下十次。但每次都有人安排（讀書同出差唔計）。京都同前妻係拍拖嘅時候就去過幾次。每次前妻都係我嘅導遊同盲公竹。所以，雖然去過幾次，如果突然放我係京都，我不單止會lost in translation仲會lost in kyoto。之前嘅名古屋資料用唔著，需要為京都之行重新搜集資料。偶然下，我認識到銅鑼灣嘅樂文書店。係樂文買咗幾本京阪神嘅旅遊書作參考。其中對我影響最深嘅就係日本關西世界遺產。往後幾年我都係跟住佢遊世遺。

2005京都之旅除咗係自己第一次「自己遊」之外，亦見證咗自己一生一件重要事件。前妻係無乜跡可尋下，選擇咗我唔係香港嗰5日搬走咗。由2002至2005，母親，好朋友同太太相繼離我而去。真正歷盡生離死別。自己覺得死別雖然較難一下子接受，但哀傷及哀悼真係可以隨時間減少。只要接受到永遠不能夠再見面嘅事實就得。生離就完全唔同。總覺得自己最初自2005年開始對京都嘅執着同前妻嘅離開或多或少有啲關係。

2005年時代祭

天婦羅一向都係自己最鍾情嘅日本料理。不過好少食。平時食任何嘢都無講究。同一樣嘅嘢，例如壽司，最平嘅回轉壽司到高級壽司料理店，我基本上都無所謂。早幾年不時幫襯銅鑼灣sushi hiro。但係後來發覺越食越貴。唔捨得，因為我真係唔覺得佢同平一截嘅有咁大分別。相反，係東京食過幾次嘅銀座久兵衛，價錢差不多（按：係十進制之後，即係之前仲要平過香港），我就覺得物超所值。首先，壽司師傅同客人之間係唔會有任何嘢（例如雪櫃）阻住師傅表現。師傅每一握，每一刀都乾淨利落，唔會有多餘嘅動作。真係好似睇表現咁。而因為差不多每完成一個動作，師傅都會洗一次手，所以我每次都會覺得難為咗佢。佢地真係為每一件壽司付出過。不過，原來唔係每一間久兵衞都一樣。試過有一次，貪方便，幫襯住緊嘅酒店分店。同一般日本百貨公司樓上嘅壽司店無分別。

講番吉川，係麻生圭子兩本書都有介紹過。知道係老鋪同得十個坐位。一定唔會差得去邊。最緊要，最貴個lunch set都係4000円。係香港，四季嘅inagiku夜晚set連加一，一千有找。今日下晝就試咗個貴set。種類同件數都比inagiku少係真嘅。但係已咁嘅價錢就可以係間百年老鋪食一餐都算豐富嘅，都算物有所值。由於無訂位，所以去到被安排係隔離嘅等位室等候。大概等咗廿分鐘。等嘅時候，除咗有熱茶供應，仲可以欣賞非常優雅嘅庭園。不失為一個消磨時間嘅好方法。

今朝係酒店對面嘅starbucks食咗一個抹茶早餐，有azuki matcha latte同cube danish azuki matcha。

係我去過嘅日本starbucks，通常都只係tall size先會有瓦杯供應。依樣嘢香港就比較進步。莫講話grande，應該係大概兩年前開始，個別嘅starbucks已經開始提供venti嘅瓦杯。日本俾我係環保嘅印象係好似全部人將嗰責任交晒俾政府處理咁。無錯佢地垃圾分類同回收係做得好好。不過，我唔覺個人嘅環保意識好強。週圍買嘢，好少見本地人自備袋。筷子梗加唔使多講。早幾年係香港慣咗自備筷子，所以好自然帶埋嚟日本。但近一年，我已經唔需要係香港自備筷子。所以今次都忘記咗帶嚟。其實，過量嘅包裝同筷子，如果唔係顧客有需求，生產商（apple就係好例子）同商鋪一定樂意減少。

食完早餐，11：30去酒店附近嘅toyota rent a car攞車，然後去宇治。

因為要泊車，所以第一次去平等院嘅南門入囗。未入平等院之前，先去中村藤吉本店醫肚。今日上下晝都係食同綠茶有關嘅食物。

中村藤吉本店

平等院嘅南門入囗

平等院

睇完平等院已經兩點半。因為揸車，所以碰一碰運氣，試下可唔可以係4點前趕到龍安寺。好彩15：45去到。搭公車一定趕唔到。

五點幾已經入黑，於是揸車去近兩年我差唔多必去嘅山元麵藏食天婦羅雞烏冬。

食完嘢，諗唔到有乜地方想揸車去，於是提早還車。

今次京都的第一次是自駕遊。當我同酒店聯絡請佢地幫我安排租車事宜嘅時候（第一次同唯一一次自駕遊係2009同老豆遊北海道），佢地當然好樂意，但係亦都補充建議我考慮坐公車。我當然知道巴士加地鐡加行路係遊京都巿區最方便同最化算嘅方法。方便，因為只要配合iphone或android手機嘅google maps，搜尋目的地除咗會有詳細嘅路線指示（例如幾時同轉乜車），仲會有埋時間表。系統會根據輸入到達目的地時間或起程時間提供行程選擇。因為係正常情況下，京都（其實全日本都係）嘅公車都非常準時，所以令到用google maps嚟安排行程更加有用。化算，因為2-day 無限使用pass只係賣兩千日元。咁啱我個日本專用銀包仲有張我舊年用過嘅2-day pass。