上年12月係網上見到withings有個可以將iphone變成血壓計嘅裝置。用app嚟記錄血壓，可以話係理所當然，合情合理。另外見個裝置成個真嘅血壓計一樣，應該都唔會唔準得去邊。其實準唔準係其次，最緊要係唔準得嚟次次都係咁唔準。因為血壓最重要係睇「走勢」。係香港見過好幾間鋪頭都有withings賣，不過唔夠amazon平，加上我要買多兩個當聖誕禮物，所以三個都係amazon買。

由收到血壓計到今日差不多兩個月，我每日都有度，連去日本都帶埋佢去。因為佢非常易用，所以無藉口唔用。最近，我仲係跑完步之後都度埋。結果俾我發現，原來係跑完步15分鐘（我最快可以返到屋企度血壓嘅時間）至1個鐘，血壓都要比平時要低（為咗減少差誤，我每次都係連續度3次）！而且唔係低少少，係低好多。

2012年2月5日血壓（跑步前／後）

我嘅跑步五寶

由於之前提過嘅「腳痛」，2011年3月開始已經唔能夠再跑步。直到12月買咗對vibram五趾跑鞋後先慢慢開始番係戶外跑步（頭幾次係跑步機上跑）。所以想報名參加今年嘅10K都報唔切。

雖然無份參與，不過都想感受o下，所以今朝係灣仔華星冰室食咗一個一啲都唔早嘅早餐之後，就行出去灣仔海傍影o下全馬健兒嘅威風。跟住沿駱克道行去銅鑼灣。原本諗住去埋終點，但係行到去sogo已經頂唔順人山人海嘅人羣，即刻以極速離開銅鑼灣。

雖然只係跟咗短短一個鐘，但係就俾我遇到件印象深刻嘅事情。係駱克道「小甜甜」（雞湯小雲呑一定要試）門口有位女士非常落力為跑手打氣。我俾佢出自真心嘅打氣感染到，所以拍低咗同大家分享。我相信今日有好多位跑手都曾經俾佢嘅衷心鼓勵激發起自己嘅小宇宙。

一位用真心為跑手打氣的女士

2012渣打馬拉松

京都國際漫畫博物館

京都國際漫畫博物館內

本來今次嘅行程未有將惠文社納於必去景點。但係因為自己最終將行程延長咗兩日，所以可以係臨走前一晚有機會去拜訪惠文社。惠文社夜晚十點先關門，所以食完飯去都得。由京都車站坐公車去大概半個鐘，唔算長，不過要轉兩種唔同嘅交通公具。不過好容易，唔會去錯車站。而最後一種交通工具叡山電車亦都非常有特色。唔係常見嘅京都地下鐡。京都同香港一樣，電車係舊時都係主要交通工具。所以去惠文社可以係一個好嘅藉口去感受一下京都嘅電車。

京都車站至惠文社

雖然唔係好知啲書講乜（因為大部份係日文書），不過睇住惠文社悉心罷設嘅書本舖排，確實係賞心樂事。

參觀過幾尊超過一千年歷史嘅木制佛像後，有啲感觸。雖然參觀過唔算少嘅文化遺產，但係總覺唔係好了解一千幾百年前嘅日本人係點生活。因為通常啲寺院都唔係好有平民百姓嘅生活痕跡留底（名古屋嘅白川鄉合掌村可能唔同，但未去過）。從建築規模同坐落地點睇，可以肯定佛教對早期嘅日本有非常大嘅影響。睇番轉頭，如果當年首都無係明治時代搬到去東京，今日嘅京都應該會面目全非。現代人可能無機會欣賞同讚嘆前人窮一生建做嘅宏偉建築及文化。突飛猛進嘅社會同科技進步難免會對舊有嘅事物帶來衝擊。將具歷史價值嘅建築拆除，然後原址興建更具成本效益的現代化設施，無可厚非。不過亦都好似抹殺咗前人嘅付出及貢獻。有時經過赤柱嘅美利樓，會覺得浪費無謂嘅資源去將一件建築物由中環搬去赤柱。但係，諗心一層，如果唔搬，就唯有拆爛佢。要係保育同發展中取得平衡，真係談何容易。有機會再分享餘下嘅感觸。

古都京都的文化財由17件建築物組成，亦即係我已經參觀過嘅古跡。

古都奈良的文化財由7件建築物及一個原始森林組成，分別為東大寺、興福寺、春日大社、平城宮跡、元興寺、藥師寺、唐招提寺，和春日山原始林。今次旅程最後一日第一次參觀咗藥師寺同唐招提寺。春日山原始林係2007去過，不過只係走馬看花。有些少遺憾。有機會一定去多次。係奈良只有元興寺未去過。

法隆寺地域的佛教建築物尚欠法起寺未去過。

紀伊山地仲未有機會踏足過。

姬路城之前我已經去過兩次。

希望下次有機會去關西一次過去晒以上未去過嘅文化遺產。

2005年較早前本來安排好去名古屋愛知縣參觀世博。機票、酒店、入場卷、各樣一早安排好。臨出門前，一直受頑病折磨嘅老友，病情惡化。於是放棄名古屋之旅。眼紅。最終，係9月18日陪老友走過佢短暫人生嘅最後一程。可能因為以上種種，所以為自己安排咗去關西散心。諗返轉頭，當決定名古屋之旅嘅時候，曾經多次係探病嘅時候，興奮地同老友分享計劃嘅進展。我諗老友可能有覺得唔好意思累我去唔成世博。其實，幾十年都無去過，又點會因為錯過一次而覺得遺憾。就算早兩年第一次去名古屋，我都無去世博展場參觀。所以，亦有可能係潛意識驅使我安排另一次日本個人遊，等老友在天上見到我終於成行。

其實，當年好興奮咁計劃嘅主要原因係第一次自己遊日本。非常慚愧，活到35歳，世界名地好多地方都去過，日本更加去過不下十次。但每次都有人安排（讀書同出差唔計）。京都同前妻係拍拖嘅時候就去過幾次。每次前妻都係我嘅導遊同盲公竹。所以，雖然去過幾次，如果突然放我係京都，我不單止會lost in translation仲會lost in kyoto。之前嘅名古屋資料用唔著，需要為京都之行重新搜集資料。偶然下，我認識到銅鑼灣嘅樂文書店。係樂文買咗幾本京阪神嘅旅遊書作參考。其中對我影響最深嘅就係日本關西世界遺產。往後幾年我都係跟住佢遊世遺。

2005京都之旅除咗係自己第一次「自己遊」之外，亦見證咗自己一生一件重要事件。前妻係無乜跡可尋下，選擇咗我唔係香港嗰5日搬走咗。由2002至2005，母親，好朋友同太太相繼離我而去。真正歷盡生離死別。自己覺得死別雖然較難一下子接受，但哀傷及哀悼真係可以隨時間減少。只要接受到永遠不能夠再見面嘅事實就得。生離就完全唔同。總覺得自己最初自2005年開始對京都嘅執着同前妻嘅離開或多或少有啲關係。

2005年時代祭